ფილტვისმიერი ტუბერკულოზი

შეტყობინებადი დაავადება.

სპეციფიკური რისკფაქტორებია: ცხოვრება აზიაში, ლათინურ ამერიკაში, აღმოსავლეთ ევროპაში ან აფრიკაში რამდენიმე წლის განმავლობაში; ტუბერკულოზის ინფექციური ფორმის მქონე პირთან კონტაქტი; სასჯელაღსრულების დაწესებულებებში ყოფნა და უსახლკარობა.

სიმპტომები შეიძლება მოიცავდეს ხველას, ცხელებას და წონის კლებას.

ფილტვის ტუბერკულოზზე ეჭვის შემთხვევაში აუცილებელია პაციენტის იზოლირება, გულმკერდის რენტგენი, ნახველის 3 ნიმუშის აღება მჟავაგამძლე ბაქტერიების ნაცხისა და დათესვისთვის, ნუკლეინის მჟავის ამპლიფიკაციის ტესტის ჩატარება, სულ მცირე ერთ რესპირატორულ ნიმუშზე.

რეკომენდებულია მკურნალობა უშუალო მეთვალყურეობით, რაც განსაკუთრებით ნაჩვენებია იმ ჯგუფებში, რომლებშიც მკურნალობისადმი კარგი დამყოლობა ნაკლებსავარაუდოა.

ტუბერკულოზის გავრცელების შეწყვეტისთვის არსებითი მნიშვნელობა აქვს ადრეულ დიაგნოსტიკას და ეფექტური მკურნალობის ჩატარებას.

ფილტვის ტუბერკულოზი ინფექციური დაავადებაა, რომელსაც იწვევს Mycobacterium tuberculosis. მრავალ შემთხვევაში, M tuberculosis არააქტიურ მდგომარეობაშია, სანამ ის აქტიურ ტუბერკულოზს გამოიწვევს. ყველაზე ხშირად ის აზიანებს ფილტვებს და გადაეცემა ამ ფორმით, მაგრამ შეიძლება დააზიანოს ორგანოთა თითქმის ყველა სისტემა, ლიმფური კვანძების, ცენტრალური ნერვული სისტემის, ღვიძლის, ძვლების, შარდსასქესო ტრაქტის და კუჭ-ნაწლავის ტრაქტის ჩათვლით.