მიკოპლაზმური ინფექცია

Mycoplasma pneumoniae იწვევს საზოგადოებაში შეძენილ პნევმონიასა და ზედა სასუნთქი გზების ინფექციას.

ინფექცია ხშირია მჭიდროდ დასახლებულ პირობებში, როგორიცაა სკოლა-ინტერნატი, სამხედრო ბაზა, უნივერსიტეტი და კლინიკები.

შარდსასქესო ტრაქტის სქესობრივი გზით გადამდები ზოგიერთი ინფექციის გამომწვევი ასევე შეიძლება იყოს მიკოპლაზმის ზოგიერთი ქვეტიპი, როგორც წესი M genitalium. 

დიაგნოზი კლინიკურად დგინდება; დიაგნოზის დასადასტურებლად შეიძლება გამოვიყენოთ ნაზოფარინგული ნაცხის პოლიმერაზას ჯაჭვური რეაქცია, ნახველის ასპირატი ან კულტურა.

როგორც რესპირატორული, ასევე შარდ-სასქესო ინფექციების მკურნალობა ტარდება ემპირიულად, მაკროლიდით ან ტეტრაციკლინის ჯგუფის ანტიბიოტიკებით.

მეორე რიგის მკურნალობის სახით შეიძლება ეფექტური იყოს ფთორქინოლონები, ან კლინდამიცინი მგრძნობიარე ინფექციებში.

მიკოპლაზმა ბაქტერიების ჯგუფია, რომელთაგან ზოგიერთი პათოგენურია ადამიანებსა და ცხოველებში. მიკოპლაზმა ყველაზე მცირე ზომის ცოცხალი მიკროორგანიზმია, როგორც ზომის, ასევე გენების რაოდენობის გათვალისწინებით. მრავალი სხვა ბაქტერიისაგან განსხვავებით, მიკოპლაზმურ მიკროორგანიზმებს უჯრედის კედელი არ აქვთ. M pneumoniae მთავარი პათოგენური სახეობაა ადამიანებში და იწვევს რესპირატორულ ინფექციებს. სხვა პათოგენური სახეობებია: M genitalium, Ureaplasma სახეობები (მოიცავს U parvum და U urealyticum), და M hominis, ორივე გვხვდება შარდსასქესო ტრაქტში. იშვიათად, სხვა სახეობები, მაგ. M amphoriforme, M fermentans, M penetrans, M pirum, და M faucium, ან ზოონოზური ჰემოტროფული მიკოპლაზმები, დაკავშირებულია ადამიანის დაავადებასთან, თუმცა აღნიშნული მიკროორგანიზმების პათოგენურობა კვლავ უცნობია.