აივ-დაკავშირებული ოპორტუნისტული ინფექციები

აივ ინფექციით მცხოვრებ პირებში (PLWH) აივ-თან დაკავშირებული ოპორტუნისტული ინფექციების (OI) რისკი იზრდება CD4 უჯრედების რაოდენობის შემცირებასთან ერთად. რისკი ასევე იზრდება იმ პაციენტებში, რომლებიც CD4 უჯრედების რაოდენობის მიუხედავად, არ იტარებენ ანტირეტროვირუსულ თერაპიას.

აივ ინფექციით მცხოვრებ პირთა უმრავლესობასთან, მწვავე ოპორტუნისტული ინფექციით, ანტირეტროვირუსული მკურნალობა (ART) უნდა განიხილებოდეს თერაპიის დაწყებიდან პირველი 2 კვირის განმავლობაში. თუმცა, ტუბერკულოზით დაავადებულ პაციენტებში ART-ს დაწყებამდე, თერაპიაზე პასუხისთვის შესაძლოა მართებული იყოს მოცდა.

ოპორტუნისტული ინფექციისთვის მკურნალობის დროს ანტირეტროვირუსული მკურნალობის გამოყენება რთულდება წამლის ურთიერთქმედებით, წამლის ტოქსიკურობის პროფილითა და იმუნური რეკონსტიტუციური ანთებითი სინდრომით (IRIS). იმუნური რეკონსტიტუციური ანთებითი სინდრომი ყველაზე ხშირად დაფიქსირებულია მიკობაქტერიული ინფექციისას (ტუბერკულოზი და დისემინირებული Mycobacterium avium კომპლექსი (MAC)), მაგრამ შესაძლოა განვითარდეს სხვა ოპორტუნისტულ ინფექციებთან ერთადაც.

აივ-ინფიცირებულ პირებში ოპორტუნისტული ინფექციების საწინააღმდეგო პირველადი და მეორეული პროფილაქტიკა აუცილებელია ოპორტუნისტული ინფექციის პირველადი ან განმეორებითი გამოვლენის პრევენციისთვის.

პროფილაქტიკა, რომელიც ტარდება ბევრი ოპორტუნისტული ინფექციის საწინააღმდეგოდ, შეიძლება შეწყდეს იმ პაციენტებთან, რომლებიც პასუხობენ ART-ს და ინარჩუნებენ CD4 უჯრედების რეკომენდებულ ზღვრულ მაჩვენებელზე მაღალ რაოდენობას 3 თვეზე მეტი ხნის განმავლობაში. თუმცა, CD4 უჯრედების რაოდენობის შემცირებისას ზღვრულ მაჩვენებელზე ქვემოთ, პროფილაქტიკა უნდა განახლდეს.

აივ-თან ასოცირებული ოპორტუნისტული ინფექციები (OIs) შეიძლება შეგვხვდეს აივ ინფექციის შორსწასულ სტადიაზე, უჯრედული იმუნიტეტის დაზიანების შედეგად. ეს ავადმყოფობები ყველაზე ხშირად აქვთ აივ ინფექციის მქონე იმ პაციენტებს, რომელთაც არ ჩაუტარებიათ მკურნალობა ან მათ, რომელთა მდგომარეობა არ დაექვემდებარა ანტირეტროვირუსულ თერაპიას. ტუბერკულოზი, Pneumocystis jirovecii პნევმონია, კანდიდოზი, კრიპტოკოკოზი, ტოქსოპლაზმოზი, ციტომეგალოვირუსი,  Mycobacterium avium კომპლექსი და კოქციდიოიდომიკოზი აივ ინფექციასთან დაკავშირებული ყველაზე ფართოდ გავრცელებული ოპორტუნისტული ინფექციებია, რომელიც ხშირად გვხვდება კლინიკურ პრაქტიკაში. ისინი განხილულია ამ თემაში.[1]National Institutes of Health, Centers for Disease Control and Prevention, HIV Medicine Association, and Infectious Diseases Society of America. Panel on Guidelines for the Prevention and Treatment of Opportunistic Infections in Adults and Adolescents with HIV. Guidelines for the prevention and treatment of opportunistic infections in adults and adolescents with HIV: Mycobacterium tuberculosis. 2024 [internet publication]. https://clinicalinfo.hiv.gov/en/guidelines/hiv-clinical-guidelines-adult-and-adolescent-opportunistic-infections/whats-new