ინფექციური ერითემა

ბავშვობაში კლასიკური გამოვლინებაა "სილაგაწნული ლოყის" სიმპტომი, რომელსაც მოჰყვება რეტიკულური, ერითემატოზული გამონაყარი ძირითადად კიდურებზე გავრცელებით. შესაძლოა წინ უსწრებდეს მსუბუქი სისტემური სიმპტომები. მოზრდილებში უფრო ხშირად გვხვდება ართრიტი და ართრალგია, ვიდრე ბავშვებში.

შემთხვევათა უმეტესობაში საჭირო არ არის სპეციფიკური მკურნალობა. საკმარისია მხოლოდ სიმპტომური თერაპია, პაციენტის დამშვიდება.

ორსულებში ინფექციის შედეგად შესაძლებელია განვითარდეს ნაყოფის ანემია, შეშუპება ან საშვილოსნოსშიდა სიკვდილი.

პერსისტენტული ინფექცია, რომელიც გრძელდება 3 კვირაზე მეტხანს და ახლავს ქრონიკული ანემია, შეიძლება შეგვხვდეს იმუნოსუპრესიულ პირებში (მაგ. აივ ინფიცირება, ქიმიოთერაპია ან ტრანსპლანტაციის შემდგომი იმუნოსუპრესიული მკურნალობა, თანდაყოლილი იმუნოდეფიციტები).

პირებს, რომელთაც აღენიშნებათ ერითროციტების სწრაფი განადგურდება/დესტრუქცია (მაგ. თანდაყოლილი სფეროციტოზი, ნამგლისებრუჯრედოვანი დაავადება, თალასემია, რკინადეფიციტური ანემია), შეიძლება განუვითარდეთ გარდამავალი აპლაზიური კრიზი.

ინფექციური ერითემა ბავშვთა დაავადება, რომელიც გამოწვეულია პარვოვირუს B19-ით. ყველაზე ხშირი გამოვლინებაა "სილაგაწნული ლოყის" სიმპტომი და რეტიკულური გამონაყარი სხეულსა და კიდურებზე. პარვოვირუს B19-ით განპირობებული ინფექცია შეიძლება ასოცირებული იყოს ართროპათიასა და კანის მეწამულისფერ გამონაყართან. გარკვეულ პოპულაციებს შეიძლება ჰქონდეთ ქრონიკული ანემიის ან გარდამავალი აპლაზიური კრიზის რისკი. ნაყოფის მხრივ გართულებებია შეშუპება და საშვილოსნოსშიდა სიკვდილი.