მოზრდილებში უცნობი წარმოშობის ცხელების შეფასება

ბოლო მიმოხილვა: 8 აპრილი 2021

ბოლო განახლება: 11 აგვისტო 2020

უცნობი ეტიოლოგიის ცხელება (FUO) თავდაპირველად განისაზღვრა როგორც ტემპერატურა >38.3°C (>100.9°F) რამდენიმე შემთხვევაში, რომელიც 3 კვირაზე მეტხანს გრძელდებოდა აშკარა წყაროს გარეშე, მიუხედავად საავადმყოფოს პირობებში სულ მცირე 1-კვირიანი გამოკვლევისა.[1] განსაზღვრების შეფასებითი ნაწილი შემდგომში შეიცვალა - "სულ მცირე 3 ამბულატორიული ვიზიტი ან 3-დღიანი ჰოსპიტალიზაცია".[2] შემდგომი ხარისხობრივი განმარტება ნაკლებად სპეციფიკურია: ტემპერატურა >38.3°C (>100.9°F) რამდენიმე განსხვავებულ შემთხვევაში; საწყისი დიაგნოსტიკური კვლევა (ამბულატორიული ან სტაციონარული) ვერ ავლენს ცხელების ეტიოლოგიას.[3] სხეულის ტემპერატურის 1.1°C-მდე (2°F) ცვალებადობა ნორმალურია. სხეულის ტემპერატურის მომატება შეიძლება იყოს ფსიქოლოგიური ბუნების, ან გამოწვეული იყოს ინფექციით, ანთებით ან ავთვისებიანი პროცესით. დიაგნოზი გვხვდება ყველა ასაკობრივ ჯგუფში, თანაბრად ორივე სქესის პაციენტებში. თუმცა, ასაკი მნიშვნელოვანი ფაქტორია დიფერენციული დიაგნოზის ფორმირებაში. FUO-ს ეტიოლოგიის ეპიდემიოლოგიური ტრენდები მსოფლიოში განსხვავებულია. ანამნეზი მოიცავს მოგზაურობების ისტორიას. ინფექცია რჩება FUO-ს ძირითად გამომწვევ მიზეზად, თანაც ამჟამად ამ დროს უფრო ხშირია ტუბერკულოზი და მუცლის ან მენჯის აბსცესი, ვიდრე ენდოკარდიტი.[3][4][5] მხედველობაში უნდა მივიღოთ ადგილობრივი ეპიდემიოლოგიური მონაცემები.