ტიფოიდური ინფექცია

ტიფოიდური ინფექცია წარმოადგენს ფეკალურ-ორალური გზით გადამდებ დაავადებას, რომელსაც იწვევს ბაქტერია Salmonella enterica, მისი სეროტიპი S. typhi და Salmonella enterica, მისი სეროტიპი S. paratyphi.

განვითარებულ ქვეყნებში დაავადება ძირითადად უვითარდება ენდემური ქვეყნებიდან შინდაბრუნებულ მოგზაურებს.

ყველაზე მაღალი ინციდენტობა აღინიშნება ინდოეთის სუბკონტინენტზე (ინდოსტანში), და, შესაბამისად, ამ რეგიონიდან შინდაბრუნებულ მოგზაურებს შორის.

ტიფოიდური ვაქცინა არ უზრუნველყოფს დაცვას პარატიფოიდური ინფექციისგან.

ეჭვის ხარისხი მატულობს, თუ აღინიშნა გახანგრძლივებული ცხელებით მიმდინარე დაავადება სისხლის თეთრი უჯრედების (ლეიკოციტების) ნორმალური რაოდენობით იმ პირებს შორის, რომელნიც დაბრუნდნენ ენდემურ  რეგიონებში მოგზაურობის შემდეგ.

დასკვნითი დიაგნოზის დასადგენად აუცილებელია სისხლის კულტურის გამოკვლევა.

მოგზაურთა სავარაუდო ანტიბიოტიკოთერაპია განისაზღვრება ქვეყნის მიხედვით.

ტიფოიდური ინფექცია წარმოადგენს ფეკალურ-ორალური გზით გადამდებ დაავადებას, რომელსაც იწვევს ბაქტერია Salmonella enterica, მისი სეროტიპი S. typhi. მსგავსი კლინიკური სინდრომის განვითარებას აგრეთვე იწვევს Salmonella enterica, მისი სეროტიპი S. paratyphi, ხოლო ტერმინები "ნაწლავური ცხელება" და ტიფოიდური ინფექცია თანაბრად გამოიყენება ორივე დაავადების ასაღწერად. თუ ეს სხვაგვარად არ არის ჩამოყალიბებული, აქ მოცემული ინფორმაცია, რომელიც ორივე დაავადებას უკავშირდება (S. typhi და S. paratyphi), აღიწერება ტერმინით ტიფოიდური ინფექცია.

დღევანდელ დღეს, ინფექციების უმრავლესობა ვლინდება ნაკლებ-განვითარებულ ქვეყნებში, სადაც კვლავ რჩება არადამაკმაყოფილებელი სანიტარული პირობები და წყლის მომარაგების წყაროები არ კონტროლირდება. ადამიანები წარმოადგენენ ერთადერთ ამოცნობილ რეზერვუარს, ხოლო დაავადების გავრცელება ხდება მწვავე დაავადების მქონე, ან მიკროორგანიზმის ქრონიკული მატარებელი პირების მიერ საკვების, ან წყლის დაბინძურების შედეგად. ტიფოიდური ინფექცია ბევრი განვითარებადი ქვეყნისთვის კვლავ რჩება ჯანდაცვის უმნიშვნელოვანეს პრობლემად, რომელიც ჯერაც შორს იმმყოფება ერადიკაციისგან. მიუხედავად იმისა, რომ განვითარებული ქვეყნების უმეტესობისთვის ეს დაავადება აღარ არის ენდემური, იგი მაინც ვლინდება მოგზაურებს შორის, რომელნიც დაბრუნდნენ ენდემური ქვეყნებიდან, განსაკუთრებით ინდოეთის სუბკონტინენტზე მოგზაურობის შემდეგ. მსოფლიოს მასშტაბით ტურიზმის და ენდემური რეგიონებიდან მიგრაციის მზარდი ტემპების გათვალისწინებით, სამედიცინო პერსონალს მართებს კარგი გათვითცნობება ამ დაავადების საკითხებზე.

ამჟამად ხელმისაწვდომი ვაქცინები უზრუნველყოფენ მხოლოდ ზომიერ დაცვას ისეთი გამომწვევისგან, როგორიცაა S. typhi და პრაქტიკულად არანაირ დაცვას ისეთი გამომწვევისგან, როგორიცაა S. paratyphi, რომელიც ამასობაში იქცა უფრო დომინანტურ პათოგენად. მულტი-რეზისტენტული შტამების მატებასთან ერთად მოსალოდნელია შემთავევათა რიცხვის მატება და კიდევ უფრო მეტი გამოწვევები მათი მკურნალობის კუთხით.