T-2 მიკოტოქსინი

აეროზოლის ექსპოზიციის შემთხვევაში, პირველმა მორეაგირე პერსონალმა უნდა ატაროს პირადი დაცვის საშუალებები და დაიწყოს მიმდებარე არეალის ევაკუაცია. დეკონტამინაცია და დამცავი ტანსაცმლის ტარება აუცილებელია, რადგან კანით კონტაქტით ინფექცია შეიძლება გადავიდეს ადამიანიდან ადამიანზე.

დიაგნოზი დგინდება კლინიკურად და ეფუძნება სიმპტომებს (მაგ. კანის ტკივილი და დაბუშტუკება, ღებინება და დიარეა, რესპირატორული სიმპტომები და სისხლდენა) და დაბინძურებულ მარცვლეულთან და/ან აეროზოლებთან ექსპოზიციის ანამნეზს. შესაძლოა განვითარდეს სისტემური სიმპტომები.

პაციენტის მართვის ქვაკუთხედს წარმოადგენს დამხმარე მოვლა ელექტროლიტებისა და სითხის აგრესიული ჩანაცვლების გზით. მკურნალობის გარეშე დატოვებული ექსპოზიციისას სიკვდილობის მაჩვენებელი არის 10-16%.

T-2 მიკოტოქსინი არის A ჯგუფის ტრიქოთეცენ მიკოტოქსინი, რომელიც მეტწილად გამომუშავდება სოკოს Fusarium სახეობების მიერ. ეს არის ერთადერთი მიკოტოქსინი, რომელიც გამოყენებულია ბიოლოგიურ იარაღად, თუმცა არსებობს სხვა ტოქსინების გამოყენების პოტენციალიც (მაგ. დიაცეტოქსისცირპენოლი). ორივე აღნიშნული მიკოტოქსინი შესულია დაავადებათა კონტროლის ცენტრების ფედერალური მნიშვნელობის საფრთხის აგენტების სიაში.[1]Centers for Disease Control and Prevention Federal Select Agent Program. Select agents and toxins list. 2014. http://www.selectagents.gov/ (last accessed 21 December 2016). https://www.selectagents.gov/SelectAgentsandToxinsList.html

ინფექციის გადაცემა, როგორც წესი, ხდება ობიანი დაბინძურებული მარცვლეულის მიღების გზით მეტწილად მაშინ, როდესაც პროდუქტი სათანადოდ შენახული არ არის. ტრანსმისიის შედეგად ვითარდება კუჭ-ნაწლავის ტრაქტის სიმპტომები, რომელსაც შესაძლოა მოჰყვეს გახანგრძლივებული ავადმყოფობა ლეიკოპენიითა და ძვლის ტვინის გენეზის სხვა უჯრედების გამოფიტვით.

ქიმიური საომარი მოქმედებების დროს ინფექცია შესაძლოა იყოს გაფრქვეული აეროზოლის სახით, რაც ტოქსიკურობას რამოდენიმე წამში იწვევს. სიმპტომები შესაძლოა განვითარდეს ინჰალაციის (იწვევს ყელის ტკივილის მწვავე სინდრომს, სისხლიან გამონადენს ცხვირიდან, დისპნოეს, ხველასა და ცხელებას) და/ან კანზე კონტაქტის გზით (წყლულები და სისტემური ტოქსიკურობა).