ზღვის ტოქსინები (საქსიტოქსინი, ტეტროდოტოქსინი, კონოტოქსინი)

ბოლო მიმოხილვა: 28 ოქტომბერი 2020

ბოლო განახლება: 03 აპრილი 2018

დიაგნოზი კლინიკურია; ეფუძნება ნიშნებსა და სიმპტომებს და ზღვის პროდუქტების ან მოლუსკების მიღების ანამნეზს ან მოლუსკების შეგროვების, ზღვაში ცურვის ან შესვლის, ყვინთვის ან აკვარიუმის მოვლის ანამნეზს.

დადასტურება უმეტესად ხდება შესაბამისი უწყებების მიერ მოლუსკში ან თევზში ტოქსინის ამოცნობით.

დამხმარე მოვლა წარმოადგენს მკურნალობის მთავარ ფაქტორს, ვინაიდან ტოქსინების საწინააღმდეგო ეფექტური ანტიდოტები არ არსებობს.

სათანადო მკურნალობის ფონზე პაციენტების უმეტესობა სრულად გამოჯანმრთელდება. ზოგიერთ მათგანთან ვლინდება პერსისტული ნევროლოგიური სიმპტომები, რომლებიც გრძელდება დღეების ან კვირეების განმავლობაში, თუმცა აღნიშნული პერიოდის შემდეგ სრულად გამოჯანმრთელდებიან.

განსაზღვრება

ზღვის ტოქსინები წარმოადგენს ზღვის ფლორასა და ფაუნას მიერ წარმოებული ნაერთების მრავალფეროვან ჯგუფს, რაც პოტენციურად საზიანოა ადამიანებისთვის. ზემოქმედება ხდება ზღვის შხამიან არსებებთან უშუალო კონტაქტით, მათი საკვებად გამოყენებით ან დაბინძურებული ზღვის პროდუქტების მიღებით.

მიმდინარე მონოგრაფია შეეხება ნეიროტოქსინებს: ტეტროდოტოქსინს, საქსიტოქსინსა და კონოტოქსინს.

ჩვეულებრივ, საქსიტოქსინი ორგანიზმში ხვდება დაბიძურებული მოლუსკის მეშვეობით.

ტეტროდოტოქსინთან კონტაქტი უკავშირდება ხორკლიანი კანის მქონე თევზის (ფუგუ) მიღებას ან ლურჯრგოლიან რვაფეხასთან უშუალო კონტაქტს.

კონოტოქსინებით ინტოქსიკაცია ხდება ზღვის შხამიან ლოკოკინებთან კონტაქტის შედეგად.

აღნიშნულმა ტოქსინებმა შეიძლება გამოიწვიოს გასტროენტეროლოგიურ ტრაქტთან დაკავშირებული და ნევროლოგიური სინდრომები გულის, კუნთის და ნეირონული ქსოვილის აღგზნებად უჯრედებში ნატრიუმის არხების ბლოკირებით. კონტაქტისშემდგომი სიმპტომები შეიძლება მოიცავდეს პერიორულ პარესთეზიას, სისუსტეს, გავრცელებად დაბუჟებასა და ატაქსიას. მიუხედავად იმისა, რომ სიმპტომატიკა დამოკიდებულია კონკრეტულ შხამიან სახეობაზე, ჩვეულებისამებრ, გამოვლინება სწრაფია და ვითარდება წუთებიდან საათების განმავლობაში. იშვიათ შემთხვევებში, მძიმე ინტოქსიკაციამ შეიძლება გამოიწვიოს კუნთების დუნე დამბლა, სუნთქვის უკმარისობა და სიკვდილი.[1]