დასავლეთ ნილოსის ვირუსი

დასავლეთ ნილოსის ვირუსული ინფექცია შეტყობინებადი მდგომარეობაა. სისხლთან, სისხლის პროდუქტებთან ან სხვა ბიოლოგიურ სითხეებთან კონტაქტისას, მათი შესაძლო ინფიცირების შემთხვევაში, საჭიროა უსაფრთხოების სტანდარტული ზომების მიღება.

ინფექციების უმეტესი ნაწილი უსიმპტომოა, თუმცა, შემთხვევათა დაახლოებით 20%-ში ვითარდება თვითგანკურნებადი, გრიპისმაგვარი დაავადება. ასეთ პაციენტთა 1%-ზე ნაკლებთან ვითარდება ნეიროინვაზიური დაავადება, რომლისთვისაც დამახასიათებელია ენცეფალიტი, მენინგიტი ან დუნე დამბლის სინდრომი (ცნობილია, როგორც დასავლეთ ნილოსის პოლიომიელიტი).

საეჭვო ნეიროინვაზიური დაავადების მქონე პაციენტში დიაგნოზი დასტურდება სეროლოგიური ანალიზით. კლინიკური გამოვლინების დროს შრატისა და ცერებროსპინური სითხის ნიმუშების უმეტესობაში შესაძლოა IgM-ის აღმოჩენა.

მკურნალობა დამხმარე სახისაა. ნეიროინვაზიური დაავადების მქონე პაციენტებს ესაჭიროებათ ჰოსპიტალიზაცია, რესპირატორული დახმარება და ინტრავენური სითხეები. ვაქცინა ან სპეციფიკური ანტივირუსული მკურნალობა არ არის ხელმისაწვდომი.

ინფექცია, რომელიც გამოწვეულია დასავლეთ ნილოსის ვირუსით (WNV), ფლავივირუსი Flaviviridae ოჯახიდან, გადაეცემა ადამიანებს კოღოს ნაკბენით ან დაინფიცირებულ სისხლთან კონტაქტის საშუალებით. შემთხვევათა უმრავლესობა უსიმპტომოა, თუმცა ინფექციას შეუძლია გამოიწვიოს თვით განკურნებადი, გრიპიმაგვარი დაავადება (დასავლეთ ნილოსის ცხელება ან WNF) ან იშვიათად დასავლეთ ნილოსის ნეიროინვაზიური დაავადება (WNND). კუნჯინის ვირუსი წარმოადგენს დასავლეთ ნილოსის ვირუსის ქვეტიპს, რომელიც ენდემურია ოკეანეთის არეში.