ახალი ტიპის მკურნალობა

ატოლტივიმაბი/მაფტივიმაბი/ოდესივიმაბი

ატოლტივიმაბი/მაფტივიმაბი/ოდესივიმაბი (ადრე ცნობილი, როგორც REGN-EB3) არის ანტისხეულების კოქტეილი, რომელიც შედგება სამი მთლიანად ადამიანის მონოკლონური ანტისხეულებისგან. მათი სამიზნეა ზაირის ებოლავირუსის არაურთიერთგადამფარავი გლიკოპროტეინის ეპიტოპები. სამი ანტისხეული ერთდროულად უკავშირდება ვირუსის ზედაპირზე არსებულ გლიკოპროტეინს და ბლოკავს ვირუსის მიმაგრებას და შეღწევას. იგი დამტკიცებულია აშშ-ს სურსათისა და წამლის სააგენტოს მიერ ზაირის ებოლავირუსის ინფექციის სამკურნალოდ როგორც ბავშვებში, ასევე ზრდასრულებში. ატოლტივიმაბი/მაფტივიმაბი/ოდესივიმაბი შეფასდა PALM კვლევის ფარგლებში, რომელიც არის მულტიცენტრული, ღია ეტიკეტის, რანდომიზებული კონტროლირებული კვლევა. ანტისხეულები შეფასდა ასევე გაფართოებული წვდომის პროგრამის ნაწილში, რომელიც ჩატარდა კონგოს დემოკრატიულ რესპუბლიკაში, 2018 წლის ეპიდაფეთქების დროს. პირველადი ეფექტიანობის საბოლოო წერტილი კვლევაში იყო 28-დღიანი სიკვდილობა. 28-ე დღეს, იმ პაციენტთაგან, რომლებიც იღებდნენ ატოლტივიმაბი/მაფტივიმაბი/ოდესივიმაბს, დაიღუპა 33.5%, ხოლო საკონტროლო ჯგუფში 51% (Zmapp).[159] ატოლტივიმაბი/მაფტივიმაბი/ოდესივიმაბი გამოიყენება ერთი ინტრავენური დოზის სახით. არასასურველი ეფექტებია ინფუზიასთან დაკავშირებული რეაქციები, ცხელება/ჟრჟოლა, ტაქიკარდია, ტაქიპნოე, ჰიპოტენზია, ჰიპოქსია და ღვიძლის ფერმენტების დონის მატება. ანტისხეულების კომბინაციამ ასევე მიიღო იშვიათი დაავადებების სამკურნალო წამლის ავტორიზაცია ევროპის მედიკამენტების სააგენტოსგან.

ანსუვიმაბი

ანსუვიმაბი (ადრე ცნობილი, როგორც mAb114) არის ადამიანის იმუნოგლობულინი G1 მონოკლონური ანტისხეული, რომლის სამიზნეა ზაირის ებოლავირუსის გლიკოპროტეინი. ანტისხეული იზოლირდა 1995 წელს კიკვიტში (კონგოს დემოკრატიული რესპუბლიკა) ეპიდაფეთქებას გადარჩენილი ადამიანისგან და შემუშავებულია აშშ-ის ჯანმრთელობის ეროვნული ინსტიტუტების მიერ. ანსუვიმაბი დამტკიცებულია აშშ-ის სურსათისა და წამლის სააგენტოს მიერ ზაირის ებოლავირუს ინფექციის სამკურნალოდ ბავშვებში და ზრდასრულებში. PALM კვლევამ აჩვენა, რომ ანსუვიმაბი უპირატესია ZMapp-თან შედარებით, სიკვდილობის შემცირების მხრივ. 28-ე დღეს, იმ პაციენტთაგან, რომლებიც იღებდნენ ანსუვიმაბს, დაიღუპა 35.1%, ხოლო საკონტროლო ჯგუფში 49.7% (Zmapp).[159] ანსუვიმაბი გამოიყენება ერთი ინტრავენური დოზის სახით. არასასურველი ეფექტებია ინფუზიასთან დაკავშირებული რეაქციები, ცხელება/ჟრჟოლა, ტაქიკარდია, დიარეა, ღებინება, ტაქიპნოე, ჰიპოტენზია და ჰიპერმგრძნობელობითი რეაქციები.

ZMapp

3 ჰუმანიზირებული მონოკლონური ანტისხეულის ექსპერიმენტალური კომბინაცია მიმართული ებოლას ვირუსის 3 გლიკოპროტეინ ანტიგენურ დეტერმინანტზე, შემუშავდა თამბაქოს ნარგავებში.[160][161][162] ZMapp-ს აღმოაჩნდა დამცავი ფუნქციები, არაადამიანურ პრიმატებში შეყვანისას ინფექციის წარმოშობიდან 24-დან 48 საათამდე პერიოდში. კიდევ ერთმა კვლევამ გამოავლინა, რომ მედიკამენტს შეეძლო არაადამიანი პრიმატების გადარჩენა, როდესაც მკურნალობა იწყებოდა ინფექციიდან 5 დღემდე პერიოდში.[163] PALM კვლევამ აჩვენა, რომ ZMapp ნაკლებად ეფექტური აღმოჩნდა, ვიდრე ატოლტივიმაბი/მაფტივიმაბი/ოდესივიმაბი და ანსუვიმაბი, სიკვდილობის შემცირების კუთხით.[159]

რემდესივირი

ადენინის ნუკლეოტიდის ანალოგი, მედიკამენტის წინა ფორმა (პრო-მედიკამენტი), რომელიც ხასიათდება ძლიერი აქტივობით ფილოვირუსების ოჯახის მრავალი წევრის წინააღმდეგ პრიმატების უჯრედების ინფექციურ მოდელებში. საწყისმა კვლევებმა წარმოაჩინა ბრწყინვალე ეფექტიანობა ებოლას ვირუსით დაინფიცირებული არაადამიანური პრიმატების მკურნალობაში.[143] PALM კვლევამ აჩვენა, რომ რემდესივირი ნაკლებად ეფექტური აღმოჩნდა, ვიდრე ატოლტივიმაბი/მაფტივიმაბი/ოდესივიმაბი ZMapp და ანსუვიმაბი, სიკვდილობის შემცირების კუთხით.[159] იგი ამჟამად გმაოიყენება COVID-19-ის სამკურნალოდ.

ფავიპირავირი

ფავიპირავირი, რომელიც მანამდე T-705-ის სახელით იყო ცნობილი, ექსპერიმენტული ანტივირუსული მედიკამენტია, რომელიც სელექციურად აინჰიბირებს ვირუსულ რნმ-დამოკიდებულ რნმ პოლიმერაზას. ის აქტიურია გრიპის ვირუსების, დასავლეთ ნილოსის ვირუსის, ყვითელი ცხელების ვირუსის, თურქული ვირუსის, ასევე სხვა ფლავივირუსის, არენავირუსის, ბუნიავირუსის, და ალფავირუსის წინააღმდეგ. მედიკამენტი ამ მომენტისთვის დაშვებულია იაპონიაში გრიპის პანდემიის დროს, მაგრამ ის ეფექტური აღმოჩნდა ებოლას ვირუსთან ბრძოლისთვის თაგვის მოდელებში.[164] გვინეაში, ადამიანებში ჩატარებულ II ფაზის კვლევებში გამოყენებული იყო უფრო მაღალი დოზა, ვიდრე გრიპის დროს. JIKI კვლევა, მულტიცენტრული, არარანდომიზებული კვლევა, რომელიც ჩატარდა გვინეაში 2014-2015 წლებში, მიუთითებს როგორც მაღალი დოზის კარგ ამტანობაზე დაბალი რესურსების პირობებში, ასევე შესაძლო სარგებელზე ვირუსის დაბალი დატვირთვის მქონე პაციენტებში.[165]

ამ მასალის გამოყენება ექვემდებარება ჩვენს წესებს