სპონტანური ბაქტერიული პერიტონიტი

ერთ-ერთი ყველაზე გავრცელებული ბაქტერიული ინფექცია ციროზით და ღვიძლის დაავადებების ბოლო სტადიის მქონე პაციენტებში.

ძირითადი სიმპტომებია მუცლის ტკივილი, ცხელება, ღებინება, მენტალური სტატუსის ცვლილება და გასტროინტესტინური სისხლდენა. თუმცა, პაციენტები, როგორც წესი, მინიმალური სიმპტომებით არიან წარმოდგენილნი, და შეიძლება ასიმპტომურებიც იყვნენ.

ასციტური სითხის ლაბორატორიული კვლევები უნდა მოიცავდეს უჯრედების რაოდენობას და კულტურას. პაციენტის საწოლთან ასციტური სითხის ანალიზი ლეიკოციტური ესთერაზის რეაგენტის ზონრით (სტანდარტული შარდის) მნიშვნელოვან როლს ასრულებს სპონსტანური ბაქტერიული პერიტონიტის (SBP) დიაგნოსტიკაში; ასციტური სითხის მაღალი მგრძნობელობის ანალიზი ლეიკოციტური ესთერაზის რეაგენტული ზონრით შეიძლება გამოვიყენოთ SBP-ის გამოსარიცხად.

განისაზღვრება ასციტურ სითხეში ნეიტროფილების აბსოლუტური რაოდენობით > 250 უჯრედი/მმ^3, მიუხედავად იმისა სახეზეა თუ არა კულტურის ზრდა.

მკურნალობა პირველ რიგში მიმართულია შესაბამისი ემპირიული ანტიბიოტიკების დროულ დანიშვნაზე. პრაქტიკოსმა ექიმმა უნდა იცოდეს რეზისტენტობის ადგილობრივი კანონზომიერებების შესახებ, განსაკუთრებით გაზრდილი რეზისტენტობის შესახებ მესამე თაობის ცეფალოსპორინებისა და ფტორქინოლონების მიმართ.

სეფსისის მქონე პაციენტებს, ან პაციენტებს, რომელთაც ჩაუტარდათ ფტორქინოლონებით პროფილაქტიკა, ან აქვთ ნოზოკომურად შეძენილი SBP-ის ან რეზისტენტული ორგანიზმებით ინფიცირების ანამნეზი, დიდი ალბათობით ესაჭიროებათ უფრო ფართო სპექტრის საწყისი ემპირიული გადაფარვა.

თირკმლის უკმარისობის მქონე პაციენტების მკურნალობის პროცესში ნაჩვენებია ალბუმინი.

ანტიბიოტიკებით ხანგრძლივი პროფილაქტიკა ნაჩვენებია იმ პაციენტებში, რომელთაც აღენიშნებათ ასციტურ სითხეში ცილის კონცენტრაცია <15 გ/ლ (<1.5 გ/ლ) ან წარსულში გადატანილი აქვთ SBP-ის ეპიზოდი.

სპონტანური ბაქტერიული პერიტონიტი (SBP) წარმოადგენს ასციტური სითხის ინფექციას, რომელიც არ შეიძლება მიეკუთვნებოდეს რომელიმე ინტრააბდომინალურ, მიმდინარე ანთებით,ან ქირურგიულად სამკურნალო მდგომარეობას. ეს არის ციროზის მქონე პაციენტებში ერთ-ერთი ყველაზე ხშირად ნანახი ბაქტერიული ინფექცია.